有無諗過：「無晒痛，就唔需要再做物理治療啦！」
作為物理治療師，總係經常被客人問：「係咪無痛，就唔洗做物理治療？」其實，呢個答案幾難答，始終每人嘅康復潛能唔同。同埋，客人喺屋企，有幾勤力去做物理治療師幫佢設計嘅復健動作，都係個影響因素。
所以，我哋每次只可以憑住案例經驗去答客人，但呢個答案又唔可以作準，此終每人嘅身體結構都好唔同。
物理治療師並唔只係幫大家止痛，佢仲會喺好多你估唔到嘅地方，幫大家手。就以前十字韌帶重建手術為例，物理治療師除咗幫客人消腫去瘀（內及外）、提升活動幅度、訓練腿部肌肉比例外，仲會調節膝關節穩定度，令客人可以90度、180度、270度或360度轉向。
所以，並唔係無痛，就可以停做物理治療。
如果物理治療師認為客人嘅康復情況理想，通常會建議客人做運動，試試感覺。只要客人好有信心及放心咁返到運動場，咁物理治療師就可以向客人頒發畢業帽啦。
Comments