有冇諗過女性運動員同男性運動員之間，除咗運動強度有差異，仲有乜唔同？
其實，女性運動員嘅受傷風險，係較男性運動員高。例如，女性股骨與脛骨角度（Q angle）係較男性多出3度，前十字韌帶受傷風險，係比男性高出3至5倍、最大攝氧量（VO2 max）亦只有男性嘅70至75%左右。
由於荷爾蒙同生理結構存差異，女性運動員亦有佢哋獨有嘅危險三角（The Female Athlete Triad）。
第一個危險三角係能量攝取不足（Low Energy Availability），運動例如長跑、舉重同體操，都好重視運動員本身嘅耐力、動作美感同體重級別，因而令女性運動員較易有異常飲食行為（Disordered Eating），減少飲食，導致營養不足，影響運動表現。
第二個危險三角係月經失調（Menstrual Dysfunction），女性運動員會因為能量攝取不足同壓力大，令內分泌出問題，經期不穩。有近69%嘅女性運動員，都有呢種情況。
最後一個就係低骨質密度（Low bone Density），當出現月經失調同能量攝取不足，女性體內嘅激素同骨質密度亦會下降，低骨質密度會增加骨折風險。
